पोहण्याकडे सर्वसाधारणपणे छंद म्हणून बघितलं जातं. रिकाम्या वेळेत किंवा वेळ मिळेल तेव्हा लोक पोहायला जातात. पोहणे हा एक उत्तम व्यायाम आहे. त्यामुळे नियमितपणे पोहण्याचा व्यायाम केल्यास नक्कीच चांगला फायदा होतो. पोहताना काही गोष्टींची काळजी घेणेही आवश्यक आहे. त्याविषयी...
......
पोहण्यामुळे बऱ्याच कॅलरी खर्च होऊ शकतात, त्यामुळे वजन कमी होतं, तसेच शरीर पीळदार होते. योग्य पद्धतीने पोहल्यामुळे धावण्यासारखे लाभ मिळू शकतात. शिवाय गुडघ्याच्या सांध्यांनाही त्रास होत नाही. कोणत्याही वयोगटातल्या व्यक्ती पोहण्याचा व्यायाम करू शकतात.
व्यायाम कोणताही असला तरी पोषक आहार घेणे गरजेचे आहे. व्यायाम आणि पोषक आहार यामुळे वजन कमी व्हायला मदत होते. पोहताना भरपूर ऊर्जा खर्च होते आणि थंड पाण्यामुळे कडकडून भूक लागते. यामुळे अतिखाणं होऊ शकतं. हा मोह टाळायला हवा. उगाचच तेलकट पदार्थ, जंक फूड न खाता, हिरव्या भाज्या, प्रोटिन शेक घेणे योग्य ठरेल.
पोहण्याच्या क्रियेत वेगवेगळे स्ट्रोक्स असतात. प्रत्येक स्ट्रोकचे वेगळे फायदे आहेत; मात्र बटरफ्लाय स्ट्रोक सर्वाधिक लाभदायी ठरतो. या स्ट्रोकमुळे फक्त दहा मिनिटांत जवळपास १५० कॅलरी खर्च होतात. यानंतर फ्रीस्टाईल या स्ट्रोकमुळे तासाला ७०४ कॅलरी खर्च होतात.
वजन कमी करण्याच्या उद्देशाने पोहायचं असेल, तर जरा जास्त प्रयत्न करावे लागतील. पोहण्याचा वेग अधिक असेल तर जास्त कॅलरी खर्च होतात. त्यामुळे पोहण्याचा वेग शक्य तितका वाढवा.
शक्यतो सकाळी न्याहरीआधी पोहावे. सकाळच्या वेळी पोहल्यामुळे शरीरातल्या फॅट्सचा सर्वाधिक वापर होईल. ऊर्जा मिळवण्यासाठी या फॅट्सचा वापर होईल आणि वजनही कमी होईल.